اسلام آباد – 16 آڪٽوبر (اي پي پي) وزيراعظم شاهد خاقان عباسي جي صدارت ۾ وزيراعظم هائوس ۾ هڪ اجلاس منعقد ٿيو، اجلاس ۾ وزيراعظم کي ملڪ جي آبي وسيلن بابت بريفنگ ڏني وئي. آبي وسيلن واري وزير سيد جاويد علي شاهه، واپڊا چيئرمين ليفٽيننٽ جنرل (ر) مزمل حسين، انڊس واٽر جي ڪمشنر آصف بيگ، ارسا چيئرمين سيد مظهر علي شاهه، فلڊ ڪميشن جو چيئرمين احمد ڪمال ۽ ٻين اعليٰ آفيسرن اجلاس ۾ شرڪت ڪئي. اجلاس ۾ ملڪ ۾ پاڻي زخيرو ڪرڻ جي گنجائش سان اولهه ۽ اوڀر دريائن مان پاڻي جي سالياني دستيابي ۽ ورڇ بابت ٻڌايو ويو، اجلاس ۾ سرحد پار آبي مسئلن ۽ تڪرارن کي فوري حل ڪرڻ لاءِ ڪيل ڪوششن بابت معاملن تي خيالن جي ڏي وٺ ڪئي وئي، اجلاس کي ٻڌايو ويو ته هن وقت دستياب 137 ملين ايڪڙ فوٽ پاڻي مان تقريبن 93 ايم اي ايف پاڻي آبپاشي جي مقصدن لاءِ واهن ۾ ڏنو پيو وڃي.