پاکستان تے ملائیشیا سانجھی تجارت تے سرمایہ کاری، دفاع سودھے ٻہوں سارے شعبیں اچ تعاون ودھیسن ، دفتر خارجہ

اسلام آباد۔29مارچ(اے پی پی) پاکستان تے ملائیشیا وچال ݙو پاسے سیاسی مشاورت دا ݙوجھا دورکوالالمپور اچ تھیا ۔ دفتر خارجہ دی ترجمان توں جاری بیان موجب مذاکرات دی مشترکہ صدارت ایڈیشنل فارن سیکرٹری (ایشیا و پیسفک) ممتاز زہرہ بلوچ اتے ملائیشیا دی وزارت خارجہ دے ڈپٹی سیکرٹری جنرل (ݙو طرفہ امور) داتو نارمن بن محمد کیتی۔ فریقین پاکستان ملائیشیا تعلقات دے سارے پہلواں دا جائزہ گھدا تے ݙو پاسے سٹریٹجک شراکت داری کوں بیا تکڑا بݨاوݨ دے عزم دی تجدید کیتی ۔ ترجمان موجب پاکستان تے ملائیشیا ہر سطح تے رابطے تے ڳالھ مہاڑ کوں ودھارا ، موجودہ ݙوطرفہ میکانزم کوں فعال اتے تعلقات کوں مزید مضبوط بݨاوݨ کیتے نویں شعبیں اچ تعاون قائم کریسن ۔ بیان اچ آکھیا ڳئے جو ݙوہیں ملک سانجھی تجارت اتے سرمایہ کاری، دفاع تے سلامتی، زراعت اتے خوراک دی حفاظت، توانائی، صحت، تعلیم تے سائنس و ٹیکنالوجی سودھے ٻہوں سارے شعبیں اچ تعاون ودھیسن ۔ ملائیشیا اچ اضافی پاکستانی افرادی قوت دی خدمات حاصل کرݨ سودھے پارلیمانی تبادلیں تے عوام وچال رابطیں دی حوصلہ افزائی کیتی ویسی ، بیان موجب ݙوہیں ملکاں وچال علاقائی امن و سلامتی، اسلامو فوبیا اتے موسمیاتی تبدیلی سودھے سانجھی دلچسپی دے ٻہوں سارے علاقائی تے عالمی امور تے ہم آہنگی پاتی ڳئی۔ فریقین کثیرالجہتی پلیٹ فارمز بشمول او آئی سی اتے اقوام متحدہ اچ نیڑے تعاون اچ آپݨی دلچسپی دا اعادہ کیتا۔ ڳالھ مہاڑ اچ پاکستان آسیان نال تعلقات ودھاوݨ دی خواہش دا اظہار کیتے جیں توں مکمل مذاکراتی شراکت داری شروع تھیسی ۔ ایڈیشنل سیکریٹری خارجہ پاکستان اچ سیلاب متاثرین کیتے فراخدلانہ مدد اتے انسانی امداد تے ملائیشیا دا شکریہ ادا کیتے۔

مضمون کا ماخذ : como jogar lotofácil

متعلقہ مضامین