صدر پاران اکين کان محروم شخص کي امتحان جو موقعو ڏيڻ کان انڪار تي ڪاوڙ جو اظهار، اي اين ايف کي ڇنڊ، وفاقي محتسب کي 30 ڏينهن ۾ فيصلو ڪرڻ جي هدايت

اسلام آباد – 28 – آڪٽوبر (اي پي پي) صدر ڊاڪٽر عارف علوي اکين کان محروم شخص کي امتحان جو موقعو ڏيڻ کان انڪار تي ڪاوڙ جو اظهار ڪندي منشيات جي خاتمي واري فورس (اي اين ايف) کي ڇنڊ پٽي آهي، صدر معاملو وفاقي محتسب ڏانهن موڪلي ڇڏيو ۽ 30 ڏينهن ۾ فيصلو ڪرڻ جي پڻ هدايت ڪئي آهي. ايوان صدر جي پريس ونگ پاران جاري بيان موجب اکين کان محروم اميدوار سليمان ارشد منشيات جي خاتمي واري فورس ۾ بطور اسسٽنٽ ڀرتي ٿيڻ جي لاءِ درخواست ڏني هئي، اميدوار کي اکين کان محروم هجڻ ۽ اسسٽنٽ جا فرض سرانجام ڏيڻ کان قاصر هجڻ جو چئي ممتحن امتحان مان ڪڍي ڇڏيو هو، سليمان ارسد (شڪايت ڪندڙ) وفاقي محتسب جي فيصلي جي خلاف صدر کي درخواست داخل ڪئي هئي. صدر اي اين ايف جي عملي پاران امتحان وٺن کان انڪار کي بدانتظامي قرار ڏئي ڇڏيو. هن چيو ته اهڙن قدمن سان اسان خصوصي ماڻهن کي قوم تي سماجي بار بڻائي ڇڏينداسين، ڪجهه ته احساس ڪريو، خصوصي ماڻهن کي معاشري جو حصو بڻائڻ، روزگار جي قابل بڻائڻ جي لاءِ خصوصي ڪوششون ڪرڻ جي ضرورت آهي. هن چيو ته بطور صدر بهترين ڪارڪردگي جو مظاهرو ڪندڙ اکين کان محروم ماڻهن کي صدارتي ايوارڊز ڏئي چڪو آهيان، عالمي سطح تي غيرمعمولي ڪم ڪندڙ اکين کان محروم پاڪستانين جا سوين مثال موجود آهن. صدر چيو ته بصارت کان محروم وڪيل يوسف سليم 2018ع ۾ پاڪستان جو پهريون اکين کان محروم جج بڻيو، صائمه سليم گڏيل قومن جي جنرل اسيمبلي کي خطاب ۾ ڪشميرين جي خودمختياري جي حق جي حمايت ۾ زوردار تقرير ڪئي، ميڊيا ۾ جڳهه ٺاهي ۽ پاڪستان جو ڳاٽ فخر سان بلند ڪيو، پاڪستان جي تختي جي پٺيان ويهي صائمه سليم بريل ۾ لکيل تقرير پڙهي ۽ هو سمورين ڪئميرامين جي نگاهن جو مرڪز هئي. صدر عارف علوي چيو ته ڪراچي ۽ اسلام آباد ۾ فوڊ آئوٽ ليٽس موجود آهن جيڪي مڪمل طور تي اکين کان محروم ماڻهو هلائي رهيا آهن. هن چيو ته اي اين ايف جي عملي جو رويو مذمت جوڳو آهي، جهالت ۽ تعصب تي ٻڌل آهي، ممتحن اميدوار کي پنهنجي مهارت جو مظاهرو ڪرڻ يا شنوائي جو موقعو ڏيڻ کانسواءِ رد ڪري ڇڏيو، اي اين ايف جو اکين کان محروم شخص جو سيڪريٽريٽ جي ملازمت جي لاءِ غيرموزون هجڻ جو موقف جهالت تي ٻڌل آهي، اي اين ايف شڪايت ڪندڙ جو معائنو ڪرڻ ۽ فٽنس جو تعين ڪرڻ جي لاءِ ميڊيڪل بورڊ کي ڪيس موڪلڻ کانسواءِ موقعو ڏيڻ کان انڪار ڪيو، اي اين ايف جو قدم انساني حقن جي سراسر خلاف ورزي آهي. صدر چيو ته پاڪستان صنفي ۽ معذوري سميت هر قسمجي فرق جي خلاف ڪيترن ئي عالمي چارٽرز ۽ معاهدن تي صحيحون ڪيون آهن. هن چيو ته وفاقي محتسب ان بنيادي رخن تي غور نه ڪيو، ڪيس کي ٻيهر ٻڌڻي ۽ ميرٽ تي فيصلو ڪرڻ جي لاءِ محتسب جي حوالي ڪيو وڃي ٿو. صدر معاملو وفاقي محتسب ڏانهن موڪلي ڇڏيو ۽ 30 ڏينهن ۾ فيصلو ڪرڻ جي پڻ هدايت ڪئي آهي. تفصيل موجب سليمان ارشد 19 نومبر 2020ع تي شايع ٿيندڙ اشتهار تي اي اين ايف ۾ اسسٽنٽ جي نوڪري تي ڀرتي جي لاءِ درخواست ڏني، ان موجب ٽيسٽ واري ڏينهن امتحان واري جڳهه تي پهچڻ کانپوءِ اي اين ايف جي لاڳاپيل آفيسر ان کي امتحان ۾ ويهڻ جي اجازت نه ڏني ۽ چيو ته هو اکين کان محروم آهي ۽ اسسٽنٽ جا فرض سرانجام نه ٿو ڏئي سگهي، ان کانپوءِ هن وفاقي محتسب سان رابطو ڪيو ۽ درخواست ڪئي ته ان معاملي تي اکين کان محروم شخص اسسٽنٽ جا فرض سرانجام نه ٿو ڏئي سگهي، جي حوالي سان فيصلو ڪيو وڃي. شڪايت ڪندڙ اي اين ايف جي نمائندي جا دليل ٻڌا ۽ ان جو جواب ڏيڻ ۾ ناڪام رهيو. ان کانپوءِ هن صدر وٽ اپيل داخل ڪئي جنهن تي صدر وفاقي محتسب کي معاملو ٻيهر ميرٽ تي ٻڌڻ جو حڪم ڏنو.

مضمون کا ماخذ : sorteios quina

متعلقہ مضامین