اسلام آباد – 29 – مئي (اي پي پي) پاڪستان عالمي امن ۽ سلامتي قائم ڪرڻ ۾ امن دستن پاران ادا ڪيل اهم ڪردار کي ساراهيندي چيو آهي ته هو گڏيل قومن جي امن مشن جي اصولن جي لاءِ پنهنجي اڻٿڪ حمايت جو ورجاءُ ڪري ٿو ۽ گڏيل قومن جي امن مشن جي هڪ حصي جي طور تي عالمي امن ۽ سلامتي جي بحالي جي لاءِ پنهنجو تعاون جاري رکڻ جو منتظر آهي. گڏيل قومن جي امن دستن جي عالمي ڏهاڙي جي موقعي تي پرڏيهي آفيس جي ترجمان پاران جاري بيان ۾ چيو ويو آهي ته گڏيل قومن جي امن فوج جي ڇهن ڏهاڪن تي ٻڌل هڪ شاندار تاريخ سان گڏ پاڪستاني امن دستا بشمول مرد عورتون دنيا جي ڪيترن ئي خطن ۾ تڪرارن جي خاتمي ۽ امن جي بحالي لاءِ عالمي ڪوششن ۾ سڀ کان اڳتي رهيا آهن. بيان موجب 235000 کان وڌيڪ پاڪستاني گڏيل قومن جي امن دستن گڏيل قومن جي 48 امن مشنز ۾ امتيازي خدمتون سرانجام ڏنيون آهن، پاڪستان مسلسل گڏيل قومن ۾ سڀ کان وڌيڪ فوجي تعاون ڪندڙ ملڪن مان هڪ جو مقام برقرار رکي ٿو. بيان ۾ وڌيڪ چيو ويو آهي ته امن دستن ۾ شامل 181 پاڪستانين هيستائين ڊيوٽي دوران شهرين جي حفاظت ۽ ان عمل ۾ گڏيل قومن جي امن دستن جي مينڊيٽ کي برقرار رکندي جانين جي قرباني ڏني آهي. بيان موجب پاڪستان کي پنهنجي عورت امن دستن جي خدمتن تي فخر آهي ۽ هو گڏيل قومن جي امن مشن ۾ انهن جي ڪردار کي وڌائڻ جي لاءِ پرعزم آهي، 500 کان وڌيڪ پاڪستاني عورت امن دستن گڏيل قومن جي مختلف مشنز ۾ خدمتون سرانجام ڏنيون آهن ۽ ان عمل ۾ ڪيترائي اعزاز حاصل ڪيا آهن. بيان ۾ وڌيڪ چيو ويو آهي ته پاڪستان انهن پهرين ملڪن مان هڪ آهي جن گڏيل قومن جو 15 سيڪڙو عورت اسٽاف آفيسرز جي مقرري جو هدف حاصل ڪيو، پاڪستان نه رڳو گڏيل قومن ۾ سڀ کان وڌيڪ فوجي تعاون ڪندڙ هڪ اهم ملڪ جي طور تي پر دنيا جي سڀ کان پراڻي امن مشنز مان هڪ، ڀارت ۽ پاڪستان ۾ گڏيل قومن جي ملٽري آبزرور گروپ (يو اين ايم او جي آءِ پي) جي ميزبان طور گڏيل قومن جي امن جي لاءِ هڪ منفرد موقف آڻي ٿو. پاڪستان گڏيل قومن جي امن فوج جي ڪاررواين کي موجوده چئلينجز موجب بشمول آفريقي يونين جي قيادت هيٺ پيس سپورٽ آپريشنز جي ذريعي آڻڻ ۾ پڻ پنهنجو ڪردار ادا ڪرڻ جاري رکيو آهي.
