اسلامي تعاون تنظيم جي پرڏيهي وزيرن جي ڪائونسل جو افتتاحي سيشن

اسلام آباد – 22 – مارچ (اي پي پي) اسلامي تعاون تنظيم (او آءِ سي) پرڏيهي وزيرن جي ڪائونسل جو افتتاحي سيشن پارليامينٽ هائوس ۾ شروع ٿيو جنهن جو موضوع اتحاد، انصاف ۽ ترقي جي لاءِ حصيداري آهي. افتتاحي اجلاس ۾ شرڪت جي لاءِ ميمبر ملڪن جا پرڏيهي وزير، غيرملڪي مهمان، نمائندا، پارليامينٽ ميمبر ۽ ميڊيا جا نمائندا پهتا. پرڏيهي وزير مخدوم شاهه محمود قريشي مهمانن ۽ شرڪت ڪندڙ نمائندن جي آجيان ڪئي. وزيراعظم عمران خان پڻ ڪانفرنس ۾ شرڪت لاءِ قومي اسيمبلي جي هال ۾ پهتو. او آءِ سي جو سيڪريٽري جنرل حسين براهيم طحه، چيني پرڏيهي وزير وانگ يي، سعودي عرب جو پرڏيهي وزير شهزاده فيصل بن سعود السعود، اسلامي ترقياتي بئنڪ جو صدر ڊاڪٽر محمد سليمان الجاسر ۽ او آءِ سي پرڏيهي وزيرن واري ڪائونسل جي 47 هين اجلاس جي لاءِ چيئرمين نائجيريا جو حسومي مسعود پڻ اسٽيج تي وزيراعظم سان گڏ موجود هئا. افتتاحي سيشن جي شروعات قرآن پاڪ جي تلاوت سان ٿي جنهن ۾ مسلمانن جي صفن ۾ اتحاد ۽ الله تعاليٰ تي پڪو يقين رکڻ جي لاءِ الله تعاليٰ جي حڪمن تي روشني وڌي وئي. سيشن شروع ٿيندي ئي پاڪستان جو قومي ترانو وڄايو ويو. جڏهن ته ڪانفرنس ۾ مسلمان امت جي مفادن جي تحفظ جي لاءِ ڏهاڪن جي ڊگهي جدوجهد تي ٻڌل او آءِ سي جي سفر جي مختصر وڊيو ڏيکاري وئي. جمهوريه نائجيريا جي پرڏيهي وزير ۽ او آءِ سي پرڏيهي وزيرن واري ڪائونسل جي 47 هين اجلاس جي چيئرمين حسومي مسعودو پنهنجي آجياڻي واري خطاب ۾ انتهاپسندي ۽ اسلامو فوبيا جي شڪل ۾ امت کي درپيش چئلينجن تي سيمينارز ۽ ويبنارز منعقد ڪرڻ تي روشني وڌي. پنهنجي تقرير جي پڄاڻي کانپوءِ هن پاڪستان جي پرڏيهي وزير مخدوم شاهه محمود قريشي کي 48 هين اجلاس جي صدارت باضابطا طور تي ڏيڻ جي دعوت ڏني. پرڏيهي وزير پنهنجي تقرير ۾ ميمبر ملڪن جي اتحاد جي ضرورت تي زور ڏنو. سعودي عرب جي پرڏيهي وزير شهزاده فيصل بن فرحان السعود پاڪستان جي 75 هين آزادي جي ڏهاڙي ۽ او آءِ سي پرڏيهي وزيرن واري ڪائونسل جي 48 هين اجلاس جي صدارت سنڀالڻ تي پاڪستان کي مبارڪباد ڏني. سعودي پرڏيهي افغانستان ۾ امن جي لاءِ ۽ افغانستان ۾ المناڪ انساني بحران کي روڪڻ جي لاءِ مسلمان ملڪن جي ڪردار تي روشني وڌي. او آءِ سي جي سيڪريٽري جنرل حسين براهيم طحه چيو ته يوڪرين ۽ روس جي بحران سان او آءِ سي جي ميمبر ملڪن جي معيشت تي سنگين اثر پئجي سگهن ٿا جيڪي دنيا جي آبادي جو 28 سيڪڙو آهي. ڪانفرنس ۾ گڏيل قومن جي سيڪريٽري جنرل انتونيو گوتريس جو هڪ وڊيو پيغام هلايو ويو جنهن ۾ هن مسلمان دنيا تي امن ۽ انسانيت جي ترقي لاءِ اتحاد ۽ هم اهنگي کي فروغ ڏيڻ تي زور ڏنو. قازقستان جي پرڏيهي وزير علائقائي گروپن پاران بيان ڏنو. تيونس جي پرڏيهي وزير عثمان جيراندي عرب گروپ پاران هڪ لڳي 6 منٽن تي پنهنجي تقرير شروع ڪئي ۽ ان ڳالهه تي زور ڏنو ته دهشتگردي ۽ پرتشدد انتهاپسندي گڏيل دشمن آهن، جيڪي مسلمان ملڪن کي عدم استحڪام جو شڪار ڪري رهيا آهن. هن چيو ته اسان کي ڀائيچاري کي فروغ ڏيڻ ۽ پرامن رهڻ جي منصفاڻي مقصدن جي لاءِ گڏجي ڪم ڪرڻ جي ضرورت آهي.

مضمون کا ماخذ : لافانی رومانس

متعلقہ مضامین