لاہور۔19فروری (اے پی پی) وزیرِ اعظم محمد شہباز شریف پاکستان دی انسانی ہمدردی اتے فلاحی تنظٰیماں کوں ترکیہ اچ امدادی کماں تے خراج تحسین پیش کریندیں ہوئیں آکھیا جو پاکستان انسانی ہمدردی دی تنظمیاں ترکیہ اتے شام اچ اپݨے مسلمان بھراواں دی مدد اچ پیش پیش ہن ، پاکستان دے خیراتی ادارے ترکیہ اتے شام اچ امدادی کماں نال پوری قوم دا سر فخر نال اُچا کر ݙتے۔ وزیر اعظم آفس میڈیا ونگ توں جاری بیان موجب وزیرِ اعظم محمد شہباز شریف دی صدارت ترکیہ اتے شام دے زلزلہ زدگان کیتے پاکستان ولوں جاری امدادی کماں تے اعلیٰ سطح دا اجلاس آݙت وار کوں تھیا۔ اجلاس اچ پاکستان اچ انسانی ہمدردی دی تنظیماں ایدھی، سیلانی اتے الخدمت فاؤنڈیشن دے نمائندے شریک تھیے۔ اجلاس کوں این ڈی ایم اے ولوں ترکیہ اتے شام دے زلزلہ زدگان کیتے امدادی کماں اتے امدادی سامان ٻھیجݨ بارے تفصیلی طور ݙسیا ڳیا۔ چیئرمین این ڈی ایم اے اجلاس کوں ݙسیا جو گزریل اجلاس اچ وزیراعظم دی ہدایت تے خیمہ ساز صنعتکاراں نال مشورہ کر تے فی خیمہ نرخ اتے خیمے ٻݨاوݨ کیتے ویلھے دا تعین کر ڳھدا ڳے۔ آندے مہینے دے چھیکڑ تئیں پاکستان دی حکومت سردی توں بچݨ کیتے ہک لکھ خیمے ٻݨا تے ترکیہ روانہ کریسی۔ اجلاس اچ انسانی ہمدردی دے اداریاں دے سربراہان فیصل ایدھی، سیلانی ٹرسٹ دے بانی مولانا بشیر فاروقی اتے الخدمت فاؤنڈیشن دے نائب صدر عبدالشکور شریک تھیے۔ ایندے نال وفاقی وزیر منصوبہ بندی احسن اقبال، وزیراعظم دے معاون خصوصی سید طارق فاطمی،ترکیہ اتے شام اچ پاکستان دے سفراء، چیئرمین اینڈی ایم اے اتے ٻے اعلیٰ حکام وی شریک تھیے۔
