وزيراعظم محمد شهباز شريف پاران ملڪ ۾ راندين جي فروغ لاءِ محڪماڻي راندين تي پابندي ختم ڪرڻ جو اعلان

اسلام آباد – 25 – آگسٽ (اي پي پي) وزيراعظم محمد شهباز شريف ملڪ ۾ راندين جي فروغ لاءِ محڪماڻي راندين تي پابندي ختم ڪرڻ جو اعلان ڪندي چيو آهي ته دولت مشترڪه ۽ اسلامي يڪجهتي راندين ۾ پاڪستاني رانديگرن ميڊلز کٽي قوم جو نالو روشن ۽ سبز هلالي جهنڊو سربلند ڪيو آهي، ملڪ جو نالو روشن ڪندڙ رانديگرن تي قوم کي فخر آهي، ان سان نوجوان رانديگرن جي حوصلا افزائي ٿيندي، ملڪ ۾ ٻوڏ جي صورتحال جي ڪري وڏو چئلينج درپيش آهي، ٻوڏ متاثرين کي ٻيهر گهرن ۾ آباد ڪرڻ جي لاءِ سمورا وسيلا فراهم ڪيا ويندا. اهڙن خيالن جو اظهار هن وزيراعظم هائوس ۾ دولت مشترڪه ۽ اسلامي يڪجهتي راندين ۾ نمايان ڪارڪردگي ڏيکاريندڙ رانديگرن جي اعزاز ۾ تقريب کي خطاب ڪندي ڪيو. تقريب ۾ اطلاعات ۽ نشريات واري وفاقي وزير مريم اورنگزيب ۽ پاڪستان اسپورٽس بورڊ جي آفيسرن شرڪت ڪئي. وزيراعظم چيو ته پاڪستاني رانديگرن دولت مشترڪه ۽ اسلامي يڪجهتي راندين ۾ جهڙي طريقي سان محنت ڪري شاندار ڪارڪردگي ڏيکاري آهي ان سان ملڪ جو نالو روشن ٿيو آهي ۽ سبز هلالي جهنڊو دنيا ۾ سربلند ٿيو آهي، اهي ڪاميابيون سمورن رانديگرن جي والدين جي دعائن، استادن ۽ ڪوچز جي محنت، انهن جي پنهنجي راندين سان لڳاءُ ۽ ڏينهن رات محنت جو نتيجو آهي، ملڪ ۽ قوم جو نالو روشن ڪندڙ رانديگرن تي پوري قوم کي فخر آهي ۽ پاڪستان جي 22 ڪروڙ عوام انهن کي خراج تحسين پيش ڪري ٿي، پورو يقين آهي ته اسان جا رانديگر راند جي ميدان ۾ اڳي به اهڙي طرح ڪاميابين جو سفر جاري رکندا ۽ ان سان اسان جي ٻين هونهار رانديگرن جي پڻ حوصلا افزائي ٿيندي. وزيراعظم راندين جي عملدارن کي به مبارڪباد ڏني ۽ چيو ته انهن جي ٽيم ورڪ ۽ ڪوششن قوم کي هي ڏينهن ڏيکاريو آهي، اهڙي طريقي سان قدم جاري رکڻ گهرجن ۽ نوجوانن جي لاءِ موقعا پيدا ڪرڻ گهرجن، هي قوم وڏي جرئت ۽ اسان جا ٻار وڏي همت وارا هونهار ٻار آهن ۽ انهن ۾ وڌيڪ رانديگرن جو تعلق شايد امير خاندانن سان به نه آهي پر هي عظيم پاڪستاني آهن، اهڙي طرح راندين جي شعبي ۾ ٽيلنٽ جي ڳولا ڪئي وڃي ته اها تمام وڏي قومي خدمت هوندي. وزيراعظم چيو ته دولت مشترڪه ۽ اسلامي يڪجهتي راندين ۾ سوني جو تمغو حاصل ڪندڙ ارشد نديم پنهنجي ڳوٺ کي مثالي ڳوٺ ۽ اسڪول ۽ اسپتال جهڙي بنيادي سهولتن جي فراهمي جو مطالبو ڪيو آهي، مثالي ڳوٺ جي پاليسي اڳ ۾ موجود هئي پر پوءِ ان کي ختم ڪيو ويو هو پر ارشد نديم جي وٺن ۾ اهي سموريون سهولتون فراهم ڪيون وينديون ۽ اهڙي طرح جون سهولتون ٻين رانديگرن جي ڳوٺن ۾ به فراهم ڪنداسين، اميد آهي ته جن رانديگرن ڪانسي ۽ چاندي جا تمغا حاصل ڪيا آهن اهي اڳتي سوني جا تمغا کٽيندا ۽ سوني جا تمغا کٽيندڙ پلاٽينم ميڊل کڻندا، همت ڪندا ته ترقي توهان جا قدم چُمندي. وزيراعظم چيو ته رانديگرن جي لاءِ انعام جي رقم ۾ يقينن اضافو ٿيڻ گهرجي ۽ اهو اضافو ڪيو به ويندو پر هن وقت ملڪ کي ٻوڏ صورتحال جي ڪري وڏو چئلينج درپيش آهي، خيبرپختونخواهه، پنجاب ۽ سنڌ ۾ ٻوڏ سبب تمام گهڻي تباهي ٿي آهي، اڄ ئي قطر جي دوري تان واپس پهتو آهيان ۽ هينئر هڪ اجلاس ۾ ٻوڏ جي صورتحال جو جائزو ورتو ويندو ته ڪهڙي طرح اسان کي ان صورتحال کي منهن ڏيڻ جيل اءِ قدم کڻڻا آهن، لکين، ڪروڙي ماڻهو ٻوڏ سبب سخت متاثر ٿيا آهن انهن جي لاءِ وڌيڪ رقم گهرجي، جيئن به ۽ جتان به ممڪن ٿيو انهن جي لاءِ وسيلا ڳولينداسين ۽ انهن کي ٻيهر پنهنجي گهرن ۾ آباد ڪنداسين. وزيراعظم چيو ته برساتن ۽ ٻوڏ سبب 800 کان 900 ماڻهو فوت ٿيا آهن، الله تعاليٰ انهن کي جنت ۾ جڳهه ڏي ۽ پونئيرن کي صبر جميل عطا فرمائي ۽ پاڪستان ۽ پاڪستان جي عوام کي وڌيڪ ڪنهن به نقصان کان بچائي. هن چيو ته محڪماڻي راندين تي پابندي ختم ڪري رهيو آهيان ته جيئن ادارن جي وچ ۾ راندين ۾ چٽاڀيٽي کي وڌايو وڃي ۽ راندين جي ميدان ۾ پاڪستان جا نوجوان پنهنجي صلاحيتن کي مڃرائي سگهن. ان کان اڳ وزيراعظم شهباز شريف دولت مشترڪه ۽ اسلامي يڪجهتي راندين ۾ ميڊلز کٽيندڙ رانديگرن ۾ روڪ انعام پڻ ورهايا. انعام حاصل ڪندڙ رانديگرن ۾ الطاف الرحمان، شاهه حسين شاهه، عنايت الله، علي اسد، زمان انور، شريف طاهر، محمد انعام، نور دستگير بٽ ۽ ارشد نديم شامل آهن.

مضمون کا ماخذ : como apostar na mega sena

متعلقہ مضامین