پاک فوج دے سربراہ جنرل سیّد عاصم منیر نال ایرانی وزیر خارجہ امیر عبداللہیان دی ملاقات

راولپنڈی۔29جنوری (اے پی پی) پاک فوج دے سربراہ جنرل سیّد عاصم منیر نال ایران دے وزیر خارجہ امیر عبداللہیان ملاقات کیتی جیں اچ ݙوہیں فریقاں قرار ݙتے جو دہشت گردی مشترکہ خطرہ اے جئیں توں سانجھے تعاون، بہتر کوآرڈینیشن تے انٹیلی جنس شیئرنگ دے ذریعے نبݨݨ دی لوڑھ اے ۔ آئی ایس پی آر موجب اے اعلیٰ سطحی ملاقات جی ایچ کیو راولپنڈی اچ تھئی ۔پاکستان اتے ایران دے تاریخی، مذہبی اتے ثقافتی رشتے دا ادراک کریندے ہوئیں ݙوہیں فریقاں ݙوطرفہ تعلقات کوں تکڑا بݨاوݨ تے ھک ݙوجھے دے تحفظات کوں ودھ توں ودھ سمجھݨ تے زور ݙتا ۔آرمی چیف ݙوجھی ریاست دی خودمختاری اتے علاقائی سالمیت دے احترام دی مرکزیت تے زور ݙتا اینکوں مقدس، ناقابل تسخیر اتے ریاست نال ریاست دے تعلقات دا ساریں توں اہم جزو قرار ݙتا۔آرمی چیف سکیورٹی دے خدشات کوں دور کرݨ سانڳے پائیدار رابطے تے دستیاب مواصلاتی ذرائع کوں استعمال کرݨ دی لوڑھ تے زور ݙتا ۔ ݙوہیں فریقاں مشترکہ خطرات دے خلاف رابطہ کاری اتے کارکردگی کوں بہتر بݨاوݨ سانڳے ھک ݙوجھے دے ملک اچ فوجی رابطہ افسراں دی تعیناتی دے طریقہ کار کوں وختی توں وختی جلد فعال کرݨ تے اتفاق کیتے ۔ݙوہیں فریقاں ایں عزم دا اعادہ کیتے جو او نیڑے رابطے اچ رہسن تے بھرا ملکاں وچال کہیں کوں وی خلل پاوݨ دی اجازت نہ ݙیسن ۔ پاکستان اتے ایران بھرا پڑوسی ہن اتے ݙوہیں ملکاں دی تقدیر ھک ݙوجھے نال جڑی ہوئی اے ۔ ݙوہیں پاسوں سرحدی علاقے اچ امن، استحکام اتے خوشحالی سانڳے آپݨے عزم دا اعادہ کیتے جیں دی نشاندہی ݙوہیں پاسے دے لوکاں دی فلاح و بہبود سانڳے ھک ناگزیر ضرورت دے طور تے کیتی ڳئی ۔

مضمون کا ماخذ : ہاٹ اسپن

متعلقہ مضامین