اسلام آباد۔12مئی (اے پی پی):وزیر اعظم محمد شہباز شریف آزاد جموں و کشمیر دی موجودہ صورتحال تے تشویش دا اظہار کریندے ہوئیں سارے فریقین تے زور ݙتے جو او آپݨے مطالبات دے حل سانڳے پرامن لائحہ عمل اختیار کرن ۔ وزیر اعظم ایں ڳالھ تے زور ݙتے جو بحث و مباحثہ تے پرامن احتجاج جمہوریت دی خوبصورتی ہن لیکن قانون کوں آپݨے ہتھ اچ گھنݨ تے سرکاری املاک کوں ضیان پڄاوݨ برداشت نی کیتا ونڄ سڳدا ۔ انہاں آپݨی ایکس ٹائم لائن تے پوسٹ وچ آکھیے جو بدقسمتی نال افراتفری اتے اختلاف رائے دی صورتحال اچ ہمیشہ کجھ لوک ایجھے ہوندن جیڑھے وختی سیاسی پوائنٹ سکورنگ شروع کرݙیندن ۔ انہاں وزیر اعظم آزاد کشمیر نال وی ڳالھ کیتی تے خطے اچ مسلم لیگ (ن)دے سارے عہدیداراں کوں ہدایت کیتی جو او ایکشن کمیٹی دے رہنماواں نال رل تے پرامن حل ڳولن انہاں آکھیے جو مخالفین دیاں کوششاں دے باوجود امید اے معاملہ وختی حل تھی ویسی ۔